Bakıda orqan və toxuma köçürülməsinin aktual problemlərinə həsr olunmuş II Beynəlxalq konqres keçiriləcək

1-3 iyun 2016-ci il tarixlərində Bakıda Hilton otelində Türkiyə Orqan Nəqli Dərnəyi (TOND) və Türk Dünyası Transplantasiya Dərnəyinin (TDTD) birgə təşkilatçılığı və Prof. Dr. Mehmet Haberalın başçılığı ilə orqan və toxumaların köçürülməsinin aktual problemlərinə həsr olunmuş II Beynəlxalq konqres keçiriləcəkdir.

TDTD 2014-cü ildə Türkiyə, Azərbaycan və Orta Asiya dövlətlərinin transplantoloqları, nefroloqları və cərrahları daxil olmaqla dünya şöhrətli alim, Türkiyə Transplantasiya Cəmiyyətinin sədri, Başkent Universitetinin və klinikasının  qurucusu və rəhbəri, professor Mehmet Haberal tərəfindən yaradılmışdır. İlk konqres 20-22 may 2015–ci ildə Astana şəhərində 400-dən artıq nümayəndənin iştirakı ilə keçirilmişdir.

Bakıda keçiriləcək konqresdə ABŞ, Avstraliya, Kanada, Livan, İordaniya, Misir, İran,Türkiyə və Orta Asiya dövlətlərindən, eləcə də Azərbaycan mütəxəssisləri də daxil olmaqla 500-ə qədər nümayəndənin iştirakı gözlənilir. Həmçinin Dünya Transplantasiya Cəmiyətinin sədri professor Filipp O´ Conelli (Avstraliya) və digər görkəmli alimlər dəvətli qonaqlar arasındadır. Konqresdə transplantalogiyanın müxtəlif problemlərinə həsr olunmuş çıxışlar dinləniləcək plenar iclaslarda diskussiyalar aparılacaq, elmi-praktik seminarlar keçiriləcəkdir. Bu konqres Azərbaycanda orqan nəqlinin inkişafına böyük təkan verməklə, kadr və sosial-hüquqi qaydaların hazırlanmasında, orqan bağışlanması (meyit orqanlarının nəqli) sahəsində mühüm rol oynayacaqdır.

Konqres haqda ətraflı məlumatı www.tond-tdtd.com saytından və  +994503314462, + 994503135005 əlaqə telefonlarından almaq olar.

med-news.az